Salamaik tingga kampuang Silauik
Kito bapisah hanyo lai
Jo onda tuo jalan maaguik
Nak ka Tapan denai ka pai

Dima bana nagari Tapan
Di Pasisia urang katokan
Simpang tigo nan ka Kurinci
Taraso lapa iyo nak makan
Bagulai padeh jo sala ikan
Makan batambuah sutan mantari
 

Nagari Tapan nagari tuo
Ado bioskop disuduik pasa
Balainyo rami manjalang sanjo
Kalau ari akaik alah tibo
Urang kampuang banyak kalua
Kapasa sakdar mancuci mato

Pasa Tapan lataknyo tinggi
Iyo taganyuak jalan ka pai
Onda katutuih kamek galaknyo
Sasudah makan sananglah hati
Diracak kudo hanyo lai
Balai Salasa tunggu lah ambo
 

Onda diracak hanyo lai
Basilambek jo gigi tigo
Lah basikakeh manuka gigi
Nan jalannyo bantuak tu juo

Balai Salasa samakin dakek
Angin barambuih mambisiakkan
Di Aia Aji taraso panek
Singgah sabanta ditapi jalan

Rancak kampuangnyo si Aia Aji
Ditapi lauik nagarinyo data
Sanang rasonyo mamandangi
Gedung sikolanyo rancak bana

Sakiro saminik duo minik
Den racak pulo kudo palala
Gigi satu masuak mandacik
Aia Aji salamaik Tingga

Jalan bakelok hanyo lai
Maliuak-liuak dalam rimbo
Cuma ciek niaik dihati
Ka Balai Salasa hari ko juo

Kiro-kiro sabatang rokok
Alah tadanga bunyi badasia
Lah gambuang dado dek harok
Ruponyo bunyi si batang aia

Batanyo juo didalam hati
Sungai apo iko namonyo
Dicubo juo sakali mandi
Badan nan angek dingin jadinyo

Diracak juo si onda tuo
Taruih bajalan hanyo lai
Sanang paratian sajuak taraso
Balai Salasa tagak mananti
(lah sampai kito)

Kalau tuan ka pakan Satu
Tolong balikan si sarikayo
Itu rasonyo nan takandak
Ranah bundo tacinto pamit daulu
Pakan muko kito sambuang pulo
Kok untuang lapeh rindu jo taragak